Մեր մասին
Կազմակերպության գործունեության առաջին իսկ օրվանից՝ Փինք Արմենիան նախաձեռնել և իրականացրել է տարբեր միջոցառումներ և ծրագրեր՝ բարձրացնելով հասարակության իրազեկվածությունը սեռական և վերարտադրողական առողջության և իրավունքների, սեռական ճանապարհով փոխանցվող վարակների և ՄԻԱՎ/ՁԻԱՀ-ի, դրանց կանխարգելման վերաբերյալ, ինչպես նաև այնպիսի գործողություններ, որոնք խթանում են անվտանգ սեռական հարաբերություններ և վարքագիծ։ Հետագայում կազմակերպության գործունեությունը և ծառայությունների տրամադրման ոլորտն ընդլայնվեց՝ կազմակերպության օրակարգում ներառելով մարդու իրավունքների և դրանց պաշտպանության հիմնահարցերը։
Մարդու իրավունքների պաշտպանության բնագավառում կազմակերպությունը տրամադրում է ծառայությունների ամբողջական փաթեթ ԼԳԲՏ համայնքի այն ներկայացուցիչներին, ում իրավունքները ոտնահարվել են սեռական կողմնորոշման, գենդերային ինքնության և/կամ գենդերային արտահայտման հիմքով։ Ավելին, կազմակերպությունը ներկայացնում է ԼԳԲՏ անձանց կարիքներն ու շահերը, ինչպես նաև ջատագովում այդ խնդիրների լուծումն ու իրավական պաշտպանվածությունը տեղական, պետական, ինչպես նաև միջազգային մակարդակներում։
Մարդու իրավունքների պաշտպանության բնագավառում կազմակերպությունը խրախուսում և խթանում է հավասարության, խոցելի խմբերի ընդունման գաղափարները, նվազեցնում է ցանկացած հիմքով խտրականության արտահայտումը՝ հաստատելով մշակութային զգայունության և բազմազանության նկատմամբ հարգանքի միջավայր։
16 տարիների ընթացքում կազմակերպությանը հաջողվել է աչքի ընկնել իր թափանցիկ, բաց և նվիրյալ աշխատանքով։ Փինքը փոքր տեղական կազմակերպությունից վերաճել է միջազգայնորեն ճանաչված և վստահելի կազմակերպության։ Կազմակերպությունը հաստատել է կայուն համագործակցություն սեռական առողջության, մարդու իրավունքների պաշտպանության, խտրականության դեմ պայքարի, գենդերային հիմնահարցերի բնագավառներում գործող տեղական և միջազգային կազմակերպությունների հետ։
Փինքի գրասենյակները՝ համայնքային կենտրոնը և վարչական գրասենյակը, տեղակայված են Երևանում, սակայն կազմակերպությունը տրամադրում է տարածքի և ժամանակի մեջ հասանելի ծառայություններ աջակցության և օժանդակության կարիք ունեցող ցանկացած անհատի։
Փինք Արմենիան, իր անձնակազմն ու անդամները, ակտիվ սոցիալական խումբ են և ներգրավված են Հայաստանում տարբեր քաղաքացիական, քաղաքական և մշակութային նախաձեռնություններում և շարժումներում, որոնք անդրադառնում են Հայաստանի ժողովրդավարական աճն ապահովող բազմաթիվ և բազմաբնույթ խնդիրների։
Տեսլական
Արժեքներ
Առաքելություն
Յուրաքանչյուր ոք ծնվում է ազատ և հավասար՝ անկախ որևէ հատկանիշից՝ ներառյալ սեռական կողմնորոշումից, գենդերային ինքնությունից և/կամ գենդերային արտահայտումից։
Այս առաքելությամբ Փինք Արմենիան նպատակ է հետապնդում հասնել ԼԳԲՏ անձանց իրավունքների ամբողջական պաշտպանվածությանը և օրենքի առաջ հավասարությանը մեր երկրում՝ հզորացնելով ԼԳԲՏ անձանց կարողությունները, ազդելով որոշում կայացնողների քաղաքականության, ինչպես նաև հասարակության մոտեցումների վրա։
