ՀՀ կառավարությունը ԼԳԲՏԻ անձանց պաշպանելու քայլեր չի ձեռնարկել. HRW զեկույց


2016թ. Հայաստանի կառավարությունը քայլեր չի ձեռնարկել ԼԳԲՏԻ (լեսբի, գեյ, բիսեքսուալ, տրանսգենդեր, ինտերսեքս) անձանց դեմ ատելության խոսքի կամ խտրականությանը վերաբերող հարցերի կարգավորման ուղղությամբ, ասված է «Հյումըն ռայթս ուոթչ»-ի 2017թ. զեկույցում` նշելով, որ երկրում շարունակում են ԼԳԲՏԻ մարդկանց ենթարկել խտրականության, ոտնձգությունների և ֆիզիկական բռնության:

Հղում անելով ՓԻՆՔ Արմենիայի` Հայաստանում ԼԳԲՏԻ անձանց նկատմամբ վերաբերմունքի հետազոտությանը ուսումնասիրությունում նշվում է, որ Հայաստանի բնակչության 90%-ը թշնամաբար է տրամադրված ԼԳԲՏԻ անձնաց նկատմամբ և ցանկանում է, որ սահմանափակվեն նրանց իրավունքները:

2016թ. իրադարձություններին առնչվող զեկույցում հիշատակումներ կան նաև 2015թ. դեպքերից, մասնավորապես նշվում է, որ 2015թ.-ի հոկտեմբերի ԼԳԲՏ «Rainbow» ֆորումից հետո, անհայտ անձինք թիրախավորված ահաբեկել ու սպառնացել էին որոշ մասնակիցների, հիմնականում սոցիալական ցանցերով, այդ թվում` սպառնալով այրել և սպանել նրանց։ Իշխանությունները հրաժարվել են քրեական գործ հարուցել այս սպառնալիքների հիման վրա՝ որպես հիմք բերելով ապացույցների բացակայությունը:

Բացի դա, «Հյումըն ռայթս ուոթչ»-ը, հղում անելով ՓԻՆՔ Արմենիայի տարեկան զեկույցին, արձանագրել է, որ 2015թ. Հայաստանում ԼԳԲՏ անձանց նկատմամբ բռնության և խտրականության 46 դեպք է եղել: Սա վերաբերում է միայն գրանցված դեպքերին:

Երկրորդ տարին անընդմեջ կազմակերպության հետազոտությունում նշվում է, որ Գենդերային ինքնությունը և սեռական կողմնորոշումը որպես պաշտպանության հիմքեր ներառված չեն հակախտրականությունը կամ ատելության խոսքը կարգավորող օրենքների մեջ, ինչը սահմանափակում է իրավական ճանապարհով ԼԳԲՏԻ անձանց դեմ բազմաթիվ հանցագործությունների բացահայոտւմը (Հայաստանում առհասարակ գոյություն չունի հակախտրականության և ատելության խոսքի համար առաձին օրենք, խմբ.):