Skip to content Skip to sidebar Skip to footer

Ամփոփելով IDAHOBIT շաբաթը

Ինչպես ամեն տարի, այս տարի նույնպես Փինքը նշեց սեռականության բազմազանությունը խորհրդանշող IDAHOBIT շաբաթը։ Շաբաթվա ընթացքում իրականացվեցին տարատեսակ միջոցառումներ, որոնք ուղղված էին սեռական կողմնորոշման և գենդերային ինքնության հիմքով խտրականության վտանգների մասին բարձրաձայնմանը և պետական կառույցներին ԼԳԲՏ անձանց իրավունքները պաշտպանող գործուն օրենքներ ընդունելու խրախուսմանը։

Այս տարվա IDAHOBIT-ի խորհուրդը Հայաստանում ԼԳԲՏ անձանց նկատմամբ իրավախախտումների և դրանցից բխող անպատժելիության մթնոլորտի մասին բարձրաձայնելն էր։ Շաբաթվա շրջանակներում Փինքը պատրաստել է երկու տեսահոլովակ, որոնցից առաջինը անդրադառնում է կազմակերպության կողմից վարվող երեք ռազմավարական դատավարություններին, իսկ երկրորդում ներկայացվում է Հայաստանում IDAHOBIT-ի պատմությունը։

Մայիսի 17-ին Փինքի կողմից կազմակերպվեց «Անպատժելիության 10 տարին» խորագրով կլոր սեղան-քննարկումը շահագրգիռ կողմերի հետ։ Հանդիպմանը ներկա էին Հայաստանում տարբեր երկրների դեսպանությունների, միջազգային կազմակերպությունների, Հայաստանի Մարդու իրավունքների պաշտպանի գրասենյակի և տեղական քաղհասարակության ներկայացուցիչներ, պետական պաշտոնյաներ, ինչպես նաև կազմակերպության շահառուներ, աջակիցներ և Փինքի ռազմավարական դատավարությունների դեպքերով տուժած անձինք։

Քննարկման մեկնարկին ողջույնի խոսքով հանդես եկան Հայաստանի Հանրապետության մարդու իրավունքների պաշտպան Քրիստինե Գրիգորյանը, Հայաստանում Եվրամիության պատվիրակության քաղաքական և մարդու իրավունքների հարցերով պատասխանատու Մարիա Պապամիխայիլը, Շվեդիայի դեսպանության առաքելության ղեկավարի տեղակալ Անիկա Նորդին Ջայավարդենան և Freedom House-ի Եվրոպայի և Եվրասիայի ծրագրերի տնօրեն Մարկ Բեհրենդթը։ Ելույթներով հանդես եկան նաև գործընկեր կազմակերպությունները՝ ներկայացնելով մարդու իրավունքների պաշտպանության ոլորտում իրենց գործունեությունը: Նրանք արտահայտեցին Հայաստանում ԼԳԲՏ անձանց մարդու իրավունքների վիճակի վերաբերյալ իրենց մտահոգությունները՝ նշելով, որ մարդու իրավունքների պաշտպանությունն իրենց գործունեության մեջ առանցքային դեր ունի, և որ խրախուսվում է պատշաճ քայլեր ձեռնարկել ԼԳԲՏ անձանց մարդու իրավունքների պաշտպանության ուղղությամբ։

Խորհրդանշական է, որ մայիսի 17-ի կլոր սեղան-քննարկման ժամանակ Մարդու իրավունքների եվրոպական դատարանի կողմից հրապարակվեց DIY ակումբի պայթեցման դեպքի դատական գործի վճիռը։ Ըստ վճռի՝ Եվրոպական կոնվենցիայի 3-րդ՝ Խոշտանգումների արգելման հոդվածով և 14-րդ՝ Խտրականության արգելման հոդվածով հաստատվեց, որ Հայաստանի Հանրապետությունը թույլ է տվել մարդու իրավունքների կոպիտ խախտումներ։

Այսպիսով, Հայաստանի Հանրապետությունը ոչ միայն պարտավորվում է տուժողին տրամադրել ոչ նյութական վնասի փոխհատուցում, այլ նաև անդրադառնալ օրենսդրական և իրավակիրառ դաշտում առկա խնդիրներին։

2022 թ․-ի միջոցառումների շրջանակներում Փինքն այս տարի ևս հրապարակեց «ԼԳԲՏ անձանց մարդու իրավունքների վիճակը Հայաստանում 2021 թ. ընթացքում» զեկույցը, որտեղ ամփոփված են 2021 թ.-ի ընթացքում կազմակերպության կողմից արձանագրված մարդու իրավունքների խախտումները՝ զուգորդված սեռական կողմնորոշման և գենդերային ինքնության հիմքով խտրականությամբ։

Զեկույցին ամբողջությամբ կարող եք ծանոթանալ այստեղ:

IDAHOBIT շաբաթվա շրջանակներում նաև կազմակերպվեց սթիքերներ պատրաստելու աշխատարան, որտեղ մասնակիցները ջերմ և մտերմիկ միջավայրում նկարեցին իրենց հուզող թեմաների վերաբերյալ պատկերներ։

Wordpress Social Share Plugin powered by Ultimatelysocial